Edhe Komisioni Evropian reagon ndaj deklaratave të Ramës

Gjatë një fjalimi, Rama tha se Shqipëria e Kosova mund të kenë një president të përbashkët

Keystone EPA/MALTON DIBRA

Komisioni Evropian ka reaguar ndaj komenteve të kryeministrit të Shqipërisë, Edi Rama në Kuvendin e Kosovës.

Gjatë një fjalimi, Rama tha se Shqipëria e Kosova mund të kenë një president të përbashkët, përcjell albinfo.ch.

Por, zëdhënësja e KE-së, Catherine Ray, tha se këto deklarata janë të papërshtatshme.

“Deklaratat që mund të interpretohen si një ndërhyrje politike në vendet fqinje nuk ndihmojnë në ndërtimin e marrëdhënieve të mira fqinjësore”, është shprehur ajo.

“BE pret që në të gjithë rajonin të vazhdojë ndërtimi i marrëdhënieve konstruktive dhe bashkëpunuese. BE ka vazhduar të mbështesë parimet e pajtimit dhe bashkëpunimit në këtë rajon”, ka shtuar tutje ajo.

Por, për deklaratën e Ramës kanë reaguar edhe në Shqipëri dhe Kosovë, duke qenë pro dhe kundër kësaj ideje.

Ndërkohë, në Serbi kanë kërkuar që Rama të shpallet ‘non grata’ pas komenteve të fundit.