Edhe një sulmues i gatshëm për Kosovën

Atdhe Nuhiu ka pranuar të luajë për Kosovën dhe tashmë pritet që të shtojë konkurrencën në sulm

Sulmuesi Atdhe Nuhiu mund të quhet si përforcimi më i madh i Kosovës në prag të ndeshjes me Kroacinë, shkruan albinfo.ch.

Sulmuesi shtatlartë, që aktivizohet në Angli me klubin e Sheffield Wensday, mësohet se ka pranuar ftesën e Kosovës dhe tashmë pret vetëm OK-in e FIFA-s për të qenë gati në ndeshjen që do të zhvillohet në tetor kundër Kroacisë në stadiumin “Loro Boriçi” në Shkodër.

Lojtari 1.97 metra i gjatë ka shkëlqyer me Austrinë U-21, ku në 13 ndeshje shënoi shtatë gola në periudhën 2008-2010. Tashmë 27-vjeçari është në kulmin e karrierës dhe mund t’i bëjë shumë punë Kosovës.

Gjasat janë që ai të grumbullohet që në takimin e radhës, duke shtuar në këtë mënyrë konkurrencën në repartin ofensiv të skuadrës së Albert Bunjakit.

Nuhiu në të kaluarën ka qenë pjesë edhe e Kombëtareve U-17 dhe U-19 të Austrisë, por pa mundur të luajë asnjëherë me përfaqësuesen A. Sulmuesi ka qenë edhe në planet e Shqipërisë pak vite më parë, por duhet të hiqte dorë nga pasaporta e Austrisë për t’i hapur rrugë kalimit te kuqezinjtë.

Ajo që nuk u realizua me Shqipërinë, tashmë do të bëhet fakt me Kosovën, pasi Nuhiu i ka thënë “po” ftesës së FFK-së.