Edhe një takim liderësh, pa marrëveshje

Derisa tre liderët iu shmangën deklaratave, ishte lideri i LSDM-së, Zoran Zaev, i cili tha se janë marrë vesh, që për disa ditë, të shqyrtohet mundësia e arritjes së një marrëveshje

Edhe një takim i liderëve të katër partive politike në Maqedoni, Nikolla Gruevski i VMRO DPMNE-së, Zoran Zaev i LSDM-së, Ali Ahmeti i BDI-së dhe Menduh Thaçi i PDSH-së, ka përfunduar pa marrëveshje për zgjidhjen e krizës politike në këtë shtet. I vetmi mesazh qp doli nga ky takim ishte se “bisedimet vazhdojnë”.

Derisa tre liderët iu shmangën deklaratave, ishte lideri i LSDM-së, Zoran Zaev, i cili tha se janë marrë vesh që t’i lihet kohë edhe disa ditë mundësisë së arritjes së një marrëveshje.

“Ne, liderët e partive kryesore politike, u takuam sot që ti vazhdojmë bisedimet në lidhje me formën e saktë të Qeverisë që do ti organizon zgjedhjet siç parashihet në pikën 6 nga marrëveshja e 2 qershorit. Në këtë kontekst, liderët u pajtuan që të takohen përsëri në ditët në vijim”, deklaroi Zaev.

Sipas liderit opozitar, kryeministri Gruevski ka prezantuar draft-planin e propozuar qeveritar për t’i zbatuar rekomandimet në lidhje ne reformat sistematike në fushën e sundimit të ligjit që do të “zbatohen në përputhje me pikën 6 nga marrëveshja e 2 qershorit”.

Në këtë takim kanë marrë pjesë ambasadori amerikan Jess Baily dhe ai i BE-së, Aivo Orav.

Para fillimit të protestës në Klubin e deputetëve, një grup të rinj të lëvizjes politike “BESA” protestuan me parulla kundër partive shqiptare BDI dhe PDSH, citon INA.

Gjatë ditëve të fundit ishte paralajmëruar dështimi i këtij takimi, dhe se pikërisht për shkak të kësaj, eurokomisioneri Hahn kishte anuluar praninë e tij në Shkup.