Edhe Rusia pranon: Në Srebrenicë është kryer gjenocid

Ambasadori rus, Pjetri Ivantcov, ndryshe nga paraardhësit e tij, kishte deklaruar hapur për “gjenocidin në Srebrenicë”

Edhe Federata e Rusisë ka pranuar faktin se në Srebrenicë të Bosnjës dhe Hercegovinës, është kryer gjenocid nga forcat serbe në luftën e vitit 1992-1995. Rusia me këtë rast ka nënshkruar komunikatën e Bordit të Këshillit për Zbatimin e Paqes, në të cilën janë deklaruar opinione në kundërshtim me politikën zyrtare të Republikës Serpska në Bosnjë.

Ambasadori rus, Pjetri Ivantcov, ndryshe nga paraardhësit e tij, kishte deklaruar hapur për “gjenocidin në Srebrenicë” dhe së bashku me drejtuesit e tjerë politikë kanë shprehur mbështetjen e tyre për aktivizimin e Planit të Veprimit për anëtarësim të Bosnjës e Hercegovinës në NATO, raportojnë mediet në Ballkan.

Ambasadori rus nuk ka ndryshuar qëndrimin e tij edhe gjatë debatit për sundimin e ligjit, ndërsa Përfaqësuesit i Lartë të Bosnjës e Hercegovinës, Valentin Incko, pas takimit tha se komunikata u miratua njëzëri dhe se “Bordi i ka kushtuar vëmendje të veçantë për sjelljen e disa politikanëve nga Republika Srpska, që pikërisht duke sfiduar sundimin e ligjit kanë kërkuar për të siguruar kapitalin politik”.

Rusia, ndërkaq pritet të ndihmojë me rastin në Këshillin e Sigurimit i Kombeve të Bashkuara që do të vijë me një rezolutë të Srebrenicës, të propozuar nga Britania.

Masakra që u bë në Srebrencë konsiderohet si turpi i Evropës, pasi që nën mbështetje të forcave paqësore, gjenerali serb që po ballafaqohet me drejtësinë ndërkombëtare në Hagë, Ratko Mlladiq pushtoi kampin e refugjatëve mysliman dhe më 11 korrik 1995, forcat serbe vranë dhe masakruan rreth 8 mijë boshnjak, në mesin e tyre edhe fëmijë dhe pleq.