Edon Zhegrova ende jo në formën maksimale tek Juventus, por Spalletti është bindur nga paraqitjet e tij

Që në fëmijëri, Edon Zhegrova njihej për pasionin e tij për driblimet në rrugët e lagjes. Ky stil loje u bë aq karakteristik për të, saqë shpesh krahasohej me “Messin e Kosovës”, duke nënvizuar talentin teknik dhe prirjen e tij për të kaluar kundërshtarët një nga një.

Sot, Zhegrova ka fituar një tjetër nofkë: “Mister Zeppetta”, emër që ia ka vënë Luciano Spalletti dhe që është pritur me simpati nga vetë futbollisti. Trajneri italian e gjeti anësorin në një moment të vështirë të karrierës së tij, por brenda një kohe të shkurtër arriti ta kthejë në një element vendimtar për skuadrën, edhe pse iu desh ta menaxhonte me kujdes nga ana fizike.

Problemet me pubalgjinë e kishin mbajtur Zhegrovën larg fushave për një periudhë të gjatë, madje edhe para transferimit në Torino. Ky shqetësim vazhdon të kërkojë vëmendje, pasi çdo rritje e ritmit mund të sjellë rrezik dëmtimi. Megjithatë, në ndeshjen e fundit kundër Pisas, Spalletti u befasua pozitivisht nga ndikimi i tij. Zhegrova hyri në lojë dhe ndryshoi rrjedhën e takimit, duke mbajtur një nivel të lartë performance për rreth 35 minuta dhe duke u shfaqur si lojtari më i mirë në fushë.

I afruar në ditët e fundit të merkatos së verës, fillimi i aventurës së tij te Juventusi nuk ishte i lehtë. Mungesa e aktivizimit dhe nevoja për të balancuar ngarkesën fizike e vështirësuan përshtatjen. Nën drejtimin e Tudorit, ai pati pak hapësira: vetëm 36 minuta në tri ndeshje. Situata ndryshoi me ardhjen e Spallettit, i cili i dha më shumë besim, duke e aktivizuar në 12 ndeshje me një rritje graduale të minutazhit. Kjo erdhi si rezultat i një programi specifik stërvitor, të ndarë në faza dhe të ndjekur nga afër nga stafi teknik.

Në muajt e parë në Torino, Zhegrova i kushtoi rreth 70% të punës së tij fizioterapisë dhe vetëm 30% aspektit të performancës në fushë. Me kalimin e javëve, ky raport u përmbys sipas planit të parashikuar, ndërsa ai vazhdoi ushtrimet e forcës për të përforcuar zonën abdominale. Aktualisht, gjendja e tij fizike vlerësohet rreth 75%, çka do të thotë se forma më e mirë ende nuk është arritur.

Përtej aspektit fizik, Zhegrova ka treguar një mentalitet pozitiv dhe një dëshirë të fortë për t’u rikthyer në nivelet e tij më të larta. Ai iu përkushtua plotësisht procesit të rikuperimit dhe përballoi ngarkesën e punës me optimizëm. Pikërisht kjo qasje profesionale dhe puna e vazhdueshme kanë ndikuar ndjeshëm në përmirësimin e gjendjes së tij. Tani, synimi është që Zhegrova të jetë në gjendje të përballojë ritmin e tre ndeshjeve në javë.