Ende nuk ka përfunduar shuarja e zjarreve në pyje

Sipas informacioneve që vijnë nga Forcat e Armatosura Ajrore të Zvicrës, të hënën janë angazhuar në regjion tre helikopterë “Super-Puma” me pajisje speciale për shuarje të zjarreve

Keystone

Zjarret që kishin shpërthyer qysh të martën e kaluar në dy zona të Zvicrës jugore nuk është arritur ende të shuhen. Fjala është për lokalitetet Misox (Graubünden) dhe Leventina (Tiçino), ku hapësira të mëdha pyjore kishin marrë zjarr në rrethana ende të panjohura para afër një jave.

Një udhëheqës i zjarrfikësve ka thënë për mediat zvicerane se në pyje ka ende vatra zjarri të cilat në çdo kohë mund të përhapen sërish.

Sipas informacioneve që vijnë nga Forcat e Armatosura Ajrore të Zvicrës, të hënën janë angazhuar në regjion tre helikopterë “Super-Puma” me pajisje speciale për shuarje të zjarreve. Një helikopter tjetër, i pajisur  me kamera me rreze infra të kuqe ka fluturuar në mëngjesin e sotëm në drejtim të jugut të Zvicrës. Fillimisht ai është penguar nga mjegulla.