Enver Avdyli rrezikon tre vite burg pasi kapi në shtëpi hajnin

Ai thotë se në prill të këtij viti, kur po kthehej në shtëpinë e tij, takoi dy persona të panjohur teksa po dilnin nga dritarja e shtëpisë dhe pasi i ndoqi, arriti ta kapë njërin

Vetëm pse kishte lidhur një hajdut të cilin e kishte zënë në oborrin e tij, një qytetar i Gjilanit rrezikon burgim deri në tri vjet. Por paradoksi këtu është në faktin se hajni i lidhur u dënua vetëm më 700 euro nga Gjykata në këtë qytet.

Enver Avdyli i ka thënë televizionit Kohavision se në prill të këtij viti, kur po kthehej në shtëpinë e tij, takoi dy persona të panjohur teksa po dilnin nga dritarja e shtëpisë dhe pasi i ndoqi, arriti ta kapë njërin. Avdyli thotë se nuk ka ushtruar dhunë ndaj personit që e kapi, por ndryshe thotë prokuroria në Gjilan. Prokurorja e këtij rastit, Leonora Shemsiu – Kadriu, e ka njoftuar atë se ka bërë shkelje të ligjit gjatë veprimit në raport me të dyshuarin për vjedhje.

Edhe kryeprokurori i Gjilanit, Jetish Maloku ka thënë se i dyshuari Enver Avdyli nuk e ka lajmëruar policinë në momentin që e ka kapur këtë person.

Ndryshe Avdyli thotë se në shtëpinë e tij janë vjedhur gjësende në vlerë deri 1 mijë euro, derisa i dyshuari për vjedhje është dënuar me 400 euro gjobë dhe 7 muaj burgim.