EULEX-i e liron Lirim Jakupin nga të gjitha akuzat

Ai akuzohej për veprat e kryera në Maqedoni gjatë periudhës shtator-dhjetor 2014. Kundër tij rëndonin edhe akuza për shkaktim të lëndimit të rëndë trupor etj.

Misioni Evropian për Sundim të Rendit dhe Ligjit në Kosovë – EULEX, ka njoftuar të premten përmes një komunikate se e ka liruar nga të gjitha akuzat ish-luftëtarin e tri luftërave çlirimtare, Lirim Jakupin, i cili që prej disa vitesh mbahej në paraburgim nën dyshimin kryerjes së  vrasjes së rëndë në tentativë.

Jakupi, më saktë, akuzohej për veprat e kryera në Maqedoni gjatë periudhës shtator-dhjetor 2014. Kundër tij rëndonin edhe akuza për shkaktim të lëndimit të rëndë trupor dhe sulm kundër personave zyrtarë gjatë kryerjes së detyrës. Sipas EULEX-it rasti kishte të bënte me pretendimet që i pandehuri, në shtator dhe në dhjetor të vitit 2004, kishte sulmuar dhe ka hapur zjarr ndaj zyrtarëve policorë në Shkup dhe në Tetovë duke iu shkaktuar lëndime të rënda. EULEX-si pretendonte se Lirim Jakupi iku nga vendi i krimit dhe i njëjti u arrestua në Kosovë, përkatësisht në janar të vitit 2014 dhe prej atëherë ka qenë në paraburgim.

Sipas njoftimit rasti i Lirim Jakupit ka qenë një hetim i përbashkët i kryer nga hetuesit e EULEX-it të njësitit të krimit të organizuar së bashku me prokurorët dhe hetuesit nga Republika e Maqedonisë.