EULEX-i insiston se Serbia di për krimet në Kosovë

Qeverisë së Serbisë i kërkohet që të lirojë qasjen në dokumentet zyrtare të MPB-së dhe të Ushtrisë së Serbisë të vitit 1998 – 1999

　　

EULEX-i i ka kërkuar Serbisë që pa vonesë të informojë opinionin publik nëse në afërsi të Rashkës ka me të vërtetë varrezë masive me shqiptarë të vrarë gjatë luftës.

　

Siç raportojnë mediat e Kosovës, njësia për mjekësi ligjore në raportin e vet për personat e pagjetur, i ka kërkuar Qeverisë serbe që të verifikojë lokcionin te Miniera e Rashkës, ku dyshohet se janë të varrosur 300 trupa të pajetë të shqiptarëve të vrarë gjatë luftës.

　

EULEKX-i ka deklaruar se Qeveria e Serbisë ka potencial që ta bëjë këtë, duke përdorur metodat shkencore dhe teknologjinë përkatëse.

　

Gjithashtu Qeverisë së Serbisë i kërkohet që të lirojë qasjen në dokumentet zyrtare të Ministrisë së Punëve të Brendshme dhe dokumentacionin e Ushtrisë së Serbisë të vitit 1998 – 1999 në të cilat ndodhen informacionet për luftën gjatë këtyre viteve në Kosovë.

　

Sipas EULEX-it këto dokumente janë të rëndësisë vitale për zbardhjen e fatit të personave të pagjetur. Sipas EULEX-it ende nuk dihet asgjë për fatin e 1790 personave të zhdukur gjatë luftës. Gjatë vitit 2011 ekspertët e mjekësisë ligjore, kanë kryer 84 hulumtime në terren dhe kanë gjetur trupat e 42 personave të vrarë.

　

Gjatë këtij viti janë identifikuar 30 lokacione të reja të cilat pritet të hulumtohen.

　

Sfidë tjetër është edhe përcaktimi i identitetit të trupave pa jetë mbi bazën e ADN-së.

　

Sipas EULEX-it zbardhja e fatit të personave të pagjetur ende kërkon angazhimin e të gjithëve si dhe një përkushtim të vazhdueshëm për këtë çështje shumë të ndjeshme, raportojnë mediat kosovare.

---