FBI: Shpërthimi në klinikën e fertilitetit në Palm Springs ishte akt terrorist

Autoritetet amerikane kanë identifikuar një 25-vjeçar si të dyshuarin dhe viktimën e vetme të një shpërthimi me bombë në një klinikë fertiliteti në Palm Springs, ngjarje që FBI e ka cilësuar si akt të qëllimshëm terrorizmi.

Shpërthimi ndodhi të shtunën dhe la të plagosur katër persona të tjerë. Në një konferencë për media të dielën, përfaqësues të FBI-së konfirmuan se viktima ishte gjithashtu autori i dyshuar, një banor i qytetit Twentynine Palms, rreth 57 kilometra nga vendngjarja, shkruan DW, transmeton albinfo.ch.

Sipas ndihmësdrejtorit të FBI-së në Los Angeles, Akil Davis, sulmi ishte i synuar kundër objektit që ofron trajtime të fekondimit in vitro (IVF). Ai theksoi se i dyshuari kishte pikëpamje nihiliste dhe kishte përgatitur një manifest të cilin e postoi në internet, si dhe tentoi të regjistronte shpërthimin, por videoja nuk u ngarkua.

“Ky ishte një akt i qëllimshëm terrorizmi”, deklaroi Davis. “Djemtë e mirë një, të këqijtë zero.”

Policia kontrolloi banesën e të dyshuarit dhe ndërmori masa evakuimi për banorët përreth për arsye sigurie. Megjithatë, autoritetet theksuan se nuk besojnë në një kërcënim të vazhdueshëm për komunitetin lokal.

Shefi i policisë së Palm Springs-it, Andy Mills, u shpreh se qyteti do të dalë më i fortë pas këtij sulmi. “Vendosmëria jonë për të vazhduar jetën siç e njohim këtu në Palm Springs mbetet e pandërprerë”, tha ai.

Drejtori i klinikës, Dr. Maher Abdallah, konfirmoi se shpërthimi kishte dëmtuar zyrën e konsultimeve, por laboratori i IVF dhe të gjitha embrionet e ruajtura shpëtuan të padëmtuara. Në një prononcim për Associated Press, ai tha: “Falë Zotit që sot nuk kishim pacientë në klinikë”, transmeton albinfo.ch.