Fenerbahçe hyn në garë për Edon Zhegrovën, gati oferta prej 25 milionë eurosh

Foto IG: @edonzhegrova10

Gara për transferimin e yllit të Kosovës, Edon Zhegrova, po bëhet gjithnjë e më e nxehtë këtë verë. Së fundmi, në garë është përfshirë edhe gjiganti turk Fenerbahçe, që raportohet se është i gatshëm t’i ofrojë Lille-s plot 25 milionë euro për shërbimet e sulmuesit të krahut, transmeton albinfo.ch.

Lajmi u publikua të shtunën nga portali i njohur “transferfeed”, që citon burime të afërta me klubin turk. Interesimi i Fenerbahçes vjen në një kohë kur largimi i Zhegrovës nga Ligue 1 është thuajse i sigurt.

Vetë presidenti i Lille-s, Olivier Letang, pak ditë më parë konfirmoi se Zhegrova është ndër futbollistët që do të largohet gjatë kësaj vere. 26-vjeçari ka kontratë me klubin francez deri në verën e vitit 2026, por dëshira për të provuar një aventurë të re duket se po e shtyn drejt një transferimi të madh.

Zhegrova, i cili u transferua te Lille në vitin 2022, nuk ka luajtur që nga 14 dhjetori i vitit të kaluar për shkak të një dëmtimi, por kjo nuk e ka ndalur interesimin e skuadrave të mëdha evropiane. Përveç Fenerbahçes, për të kanë shfaqur interes edhe disa klube nga Serie A dhe Premier League, transmeton albinfo.ch.