Feronikeli mposht Prishtinën dhe shpallet kampion i Kosovës

Feronikeli shpallet kampion i Ipko Superligës së Kosovës në futboll në sezonin 2018/2019, duke e mposhtur 1-0 konkurrentin e drejtpërdrejtë për titull, Prishtinën, në xhiron e fundit sezonale në kampionatin elitar vendor. 

Në stadiumin “Rexhep Rexhepi” në Drenas, skuadrës nikoqire i mjaftonte barazimi për t’iu gëzuar titullit, derisa bardhekaltrit duhet doemos ta fitonin përballjen për të festuar. 

Edhe pse ishte pritur që Feronikeli të zhvillonte lojë defensive, vendasit nuk e bënë këtë për zhvilluan lojë sulmuese, duke i bërë presion kundërshtarit. 

Rastin më të mirë në pjesën e parë e pati Mendurim Hoti, i cili nuk përfitoi nga një gabim i Visar Bekajt, derisa portieri i kryeqytetasve reagoi për ta përmirësuar gabimin e tij. 

As në gjysmën e dytë të takimit, bardhekaltrit nuk treguan ndonjë aksion, madje nuk dërguan asnjë goditje brenda kuadratit të portës dhe në këtë mënyrë u ndëshkuan, përcjell albinfo.ch. 

Një goditje e Yll Hoxhës që u duk të ishte harkim u ndal në rrjetën e portës së Bekajt (73′), teksa Albutrint Morina u përpoq ta devijonte topin. 

Në minutat e fundit, Prishtina bëri përpjekje të shumta, mirëpo nuk arritën t’i ndryshonin gjërat në stadiumin “Rexhep Rexhepi”, ashtu që mbetën nënkampionë për të dytin vit radhazi. 

Për Feronikelin, ky është titulli i tretë në histori, pas sukseseve të arritura në sezonet 2014/2015 dhe 2015/2016.