FIFA kërkon paqe, por “nuk mund të zgjidhë problemet gjeopolitike”

FIFA (Federata Ndërkombëtare e Futbollit) bëri thirrje për “paqen” në Gaza të enjten, por nënvizoi se “nuk mund të zgjidhë problemet gjeopolitike”, sipas presidentit të saj, Gianni Infantino, i cili shmangu përgjigjet ndaj thirrjeve në rritje për pezullimin e Federatës Izraelite.

Në hapjen e mbledhjes së mbyllur të bordit, udhëheqësi italo-zviceran i referohet “situatës aktuale në Gaza” dhe thekson se “forca e futbollit” qëndron në “bashkimin e njerëzve në një botë të ndarë”, duke ofruar “një mesazh paqeje dhe uniteti”, sipas një deklarate të organizatës.

“FIFA nuk mund të zgjidhë problemet gjeopolitike, por mund dhe duhet të promovojë futbollin në të gjithë botën duke shfrytëzuar vlerat e tij unifikuese, edukative, kulturore dhe humanitare,” theksoi presidenti.

Në deklaratën për shtyp nuk përmendet Izraeli apo federata e tij, ndërkohë që thirrjet për përjashtimin e ekipit kombëtar nga garat ndërkombëtare po shtohen, veçanërisht gjatë kampanjës kualifikuese për Botërorin 2026.

Së fundmi, tre ekspertë të pavarur të OKB-së i bënë thirrje FIFA-s dhe UEFA-s për të pezulluar Izraelin, duke u referuar “gjenocidit” në Gaza dhe duke argumentuar se “organet sportive nuk duhet të mbyllin sytë për shkelje serioze të të drejtave të njeriut”.

Të premten e kaluar, shefja e Federatës Norvegjeze të Futbollit, Lise Klaveness – e cila do të presë Izraelin në kualifikueset e Botërorit më 11 tetor – deklaroi se po punonte “për sanksionimin e Izraelit”. “Personalisht, mendoj se nëse Rusia është përjashtuar, edhe Izraeli duhet të përjashtohet,” tha ajo për një podcast norvegjez.

Pak ditë pas pushtimit të Ukrainës në shkurt 2022, UEFA dhe FIFA përjashtuan së bashku ekipin kombëtar rus dhe klubet nga garat ndërkombëtare, një sanksion që vazhdon të jetë në fuqi.