Fillon Premierliga “e shqiptarëve”

Këtë sezon do të kemi një numër rekord të shqiptarëve në këtë ligë. Katër i takojnë përfaqësueses së Zvicrës, që të katërtit me prejardhje nga Kosova: Shaqiri, Behrami, Xhaka dhe Tarashaj. Pastaj vijnë edhe Celina, Bytyqi dhe (ndoshta) Shkodran Mustafi

Të shtunën (sot) fillon njëra nga ligat më të forta në botë, Premierliga angleze, që cilësohet edhe si liga më atraktive. Këtë sezon do të jetë shumë interesant, jo vetëm për shkak të trajnerëve ndër më të mirë në botë dhe shpenzimeve marramendëse, por edhe për shkak të futbollistëve shqiptarë, shkruan albinfo.ch.

Këtë sezon do të kemi një numër rekord të shqiptarëve në këtë ligë. Katër përfaqësuesit e Zvicrës, që të katërtit me prejardhje nga Kosova, luajnë në klubet e ndryshme, si Xherdan Shaqiri në Stoke City, Granit Xhaka në Arsenal, Shani Tarashaj në Everton, Valon Behrami në Watford. Në Arsenal Xhakës pritet t’i bashkohet edhe Shkodran Mustafi, i cili është përfaqësues i Gjermanisë.

Adnan Januzaj është huazuar zyrtarisht në Sunderland nga Manchester United, kurse Manchester City ka dy talentet kosovare, Bersant Celinën dhe Sinan Bytyqin.

Të shtunën do të zhvillohen takimet e para, derisa deri në fund të kampionatit pritet një luftë e madhe për titullin e kampionit, por edhe për garat evropiane e për mbijetesë.