Fitore bindëse: 60% votojnë për natyralizimin e lehtësuar

“Teksti i iniciativës ishte shumë i moderuar në krahasim me atë të iniciativave të mëhershme me këtë temë", ka thënë Claude Longchamp nga gfs Bern duike shpjeguar "lehtësinë" me të cilën është arritur shumica

Fitorja e iniciativës për natyralizim të lehtësuar, tashmë është faktike dhe madje më bindëse se që ishte pritur. Deri në shpalljen e rezultateve përfundimtare duhet pritur edhe ndonjë orë, por të gjitha informatat që deri nga ora 15 kanë ardhur nga qendrat e numërimit të votave flasin për një fitore prej 60 për qind të iniciativës.

Ka pasur dyshime se natyralizimi i lehtësuar mund të dështonte në numrin e kantoneve që votojnë pro ose kundër por ndërkohë edhe kjo dilemë u hoq, transmeton albinfo.ch televizionin publik zviceran srf. Madje që të gjitha kantonet e cilësuara si “të brishta”, kanë votuar për iniciativën.

Sipas gjendjes në orën 15, në 19 kantone është siguruar shumica në favor të iniciativës dhe vetëm në 7 sosh, iniciativa ka mbetur në pakicë. Edhe në kantonin Neuchatel, nga i cili mungonin të dhënat, është pothuajse e sigurt se i është thënë po natyralizimit, shkruajnë mediat zvicerane. (Ndërkohë merret vesh se kantoni Neuchatel ka votuar me 75% në favor).

Lidhur me “lehtësinë” me të cilën u arrit kjo shumicë, ekspertët kanë këtë sqarim: “teksti i iniciativës ishte shumë i moderuar në krahasim me atë të iniciativave të mëhershme me këtë temë”, përcjell albinfo.ch. Kështu ka thënë Claude Longchamp nga gfs Bern. Po ashtu është pjekur bindja në mesin e qytetarëve zviceranë se të huajt e gjeneratës së tretë, duke qenë se edhe prindërit e tyre janë rritur në Zvicër,  tashmë janë “qytetarë normalë, si unë dhe si ti”, ka thënë Longchamp.

Ndër kantonet ku është arritur shumicë më e lartë e përkrahësve të iniciativës, janë, sipas traditës, kantonet më liberale, ato të Zvicrës Frankofone, si Gjeneva dhe Vaudi me 74 respektivisht 72.8%. Ndërkaq me 67 për qind në favor të natyralizimit të lehtësuar të brezit të tretë kanë votuar qytetarët e kantonit Baselstadt. Edhe kantoni i Cyrihut, me 63% ka kaluar mesataren e Zvicrës në këtë drejtim.

Nga ana tjetër, kundërshtarët e iniciativës kanë fituar në kantonet e Zvicrës lindore dhe asaj qendrore.