“Forumi Shqiptar”, fitues në Tuz

Të dielën në Tuz të Malit të Zi janë mbajtur zgjedhjet lokale, ku në garë ishte edhe koalicioni “Forumi Shqiptar”, të cilit i priu kryetari aktual, Nik Gjeloshaj.

Nga votimet e një dite më parë del se Gjeloshaj bindshëm ka fituar në Tuz. Sipas rezultateve paraprake, “Forumi Shqiptar” siguroi mbi 51 për qind të votave dhe mori 18 mandate në Kuvendin e Komunës së Tuzit, nga 32 gjithsej, shkruan Zëri i Amerikës, përcjell albinfo.ch.

Gjeloshaj si kryetar i Alternativës Shqiptare formoi koalicion me Lidhjen Demokratike të Shqiptarëve, Unionin Kombëtar Shqiptar dhe Lidhjen Demokratike në Mal të Zi.

Kundërshtar i tij kryesor ishte koalicioni “Rruga e Drejtë”, i përbërë nga Partia Demokratike e Socialistëve e presidentit aktual të Malit të Zi, Milo Gjukanoviç, Partia Boshnjake, Social Demokratët dhe Unioni Demokratik i Shqiptarëve i cili mori dymbëdhjetë mandate nga këto zgjedhje, raporton Zëri i Amerikës, përcjell albinfo.ch.

Nga një mandat e morën dy parti më të vogla. Këtë të diel në Tuz votuan mbi 66% të votuesve të regjistruar. Me fitoren e plotë të “Forumit Shqiptar”, Nik Gjeloshaj ka mandat të formojë qeverisjen lokale vetëm.

---