Franca tërhiqet nga angazhimi për ndalimin e anijeve me emigrantë në Kanalin e La Manshit

Foto Ilustrim

Franca është tërhequr nga premtimi i dhënë së fundmi për të përdorur masa të forta në det me qëllim ndalimin e kalimit të anijeve të vogla me emigrantë përmes Kanalit të La Manshit, raportoi BBC., përcjell albinfo.ch.

Sipas burimeve, tensionet e brendshme politike në Francë kanë ndikuar në këtë vendim, i cili konsiderohet një goditje për përpjekjet e qeverisë britanike për të frenuar emigracionin e paligjshëm.

Ndërkohë, çdo ditë vazhdojnë të nisen anije të mbipopulluara nga brigjet pranë portit të Dunkirkut, pavarësisht përpjekjeve të autoriteteve për t’i penguar ato.

Shefi i sigurisë kufitare në Britaninë e Madhe, Martin Hewitt, shprehu “zhgënjimin” e tij për mungesën e veprimit nga pala franceze dhe e cilësoi premtimin për një “doktrinë të re detare” si të pavlefshme. Kjo doktrinë parashikonte që anijet patrulluese franceze të ndalonin mjetet me emigrantë dhe t’i tërhiqnin ato përsëri në breg.

Një zyrtar francez e përshkroi këtë politikë si “një manovër politike”, ndërsa ish-ministri i Brendshëm Bruno Retailleau ishte vlerësuar për qasjen e tij më të ashpër ndaj kalimeve të paligjshme.

Kujtojmë se në korrikun e kaluar, presidenti Emmanuel Macron dhe kryeministri britanik Sir Keir Starmer zhvilluan një samit për këtë çështje, duke theksuar bashkëpunimin në ndalimin e të ashtuquajturave “anije taksi”, të cilat përdoren nga kontrabandistët për të transportuar emigrantët përgjatë vijës bregdetare.

Megjithatë, policia franceze rrallë ndërhyn ndaj këtyre mjeteve, pasi rreziku për jetën e oficerëve dhe civilëve mbetet shumë i lartë.