Francezët, më vonë në pension

Zgjatja e stazhit të punës nga 41.5 vjet sa është tash,bëhet 43 vjet. Por lëvizja do të bëhet në mënyrë graduale, ashtu që caku planifikohet të arrihet në vitin 2035

Pensionimi pas vetëm 41.5 vite punë është një privilegj që e gëzojnë vetëm francezët. Por, edhe këtij privilegji do t`i vijë fundi së shpejti. Parlamenti i Francës ka miratuar me shumicë votash reformën e të drejtës së pensionimit, të propozuar nga qeveria socialiste dhe shumë të kritikuar nga sindikatat e vendit.

Bëhet fjalë për reformën më me peshë që ka ndërmarrë presidenti Hollande në mandatin e tij. Pikë qendrore e kësaj reforme është zgjatja e “stazhit” të punës nga 41.5 vjet sa është tash, në 43 vjet. Por lëvizja do të bëhet në mënyrë graduale, ashtu që caku planifikohet të arrihet  në vitin 2035.

Ndonëse sindikatat e kanë kundërshtuar këtë reformë, protestat e tyre kanë qenë më të pakta se ato të bëra kundër qeverisë së ish presidentit konservativ Sarkozy, shkruan nzz.ch

Në vitin 2010 kundër qëllimit të Sarkozy-t për zgjatjen e stazhit të punës kishin protestuar miliona francezë të cilët për ditë të tëra kishin bllokuar rafineritë e naftës duke shkaktuar mungesë karburantesh. Në protestat e të rinjve të atij viti kishte pasur edhe të plagosur.