Ftohen qytetarët në diasporë të regjistrojnë ndërtimet pa leje

Regjistrimi i ndërtimeve pa leje mund të bëhet deri më 11 qershor 2015

Gjatë një takimi ndërmjet ministrit të Diasporës, Valon Murati dhe ministrit të Ministrisë së Mjedisit e Planifikimit Hapësinor, Ferid Agani është biseduar për procesin e trajtimit të ndërtimeve pa leje dhe legalizimi për bashkatdhetarët në diasporë.

Ministri Murati tha se qytetarët e diasporës duhet t’i regjistrojnë ndërtimet e tyre pa leje, në mënyrë që të bëhen pjesë e procesit të legalizimit.

Regjistrimi i ndërtimeve pa leje mund të bëhet deri më 11 qershor 2015.

Formulari për regjistrim mund të shkarkohet nga vebfaqja e MeD-së dhe të dorëzohet në Komunë, ku gjendet ndërtimi.

Bashkatdhetarët mund ta autorizojnë dikë që në emër të tyre ta dorëzojë formularin në zyrat komunale.

Gjithashtu, të gjitha informatat për këtë proces janë të publikuara në vebfaqen e MeD-së.

Ministri Murati theksoi se nga 1 korriku deri më 2 gusht, muaj ky kur fillojnë “Ditët e diasporës”, MeD-ja do t’i informojë për së afërmi bashkatdhetarët me procesin e legalizimit.

I gjithë materiali informues lidhur me procesin të legalizimit do të jetë edhe në pikat kufitare, në aeroport etj.

Ndërkaq, ministri Agani , ndër të tjera, i inkurajoi bashkatdhetarët që t’i regjistrojnë ndërtimet e tyre deri më 11 qershor 2015.

Ai tha se qytetarët duhet të kontrollojnë se a është i përfshirë ndërtimi i tyre në regjistrin e ndërtimeve dhe po qe se hasin në ndonjë gabim, duhet ta lajmërojnë komunën përmes formularit për ankesa. Afati për ankimim fillon më 17 qershor dhe vazhdon deri më 11 shtator 2015.