Funksioni i ri i SBB shkakton konfuzion te udhëtarët

Një funksion i ri në makinat e biletave të hekurudhave zvicerane (SBB), i prezantuar në shtator 2025, po shkakton paqartësi te udhëtarët. Ky opsion u lejon klientëve që biletën ta ngarkojnë drejtpërdrejt në kartën SwissPass, pa pasur nevojë për biletë fizike.

Megjithatë, problemi kryesor është se këto bileta nuk shfaqen në aplikacionin mobil të përdoruesit. Si pasojë, shumë udhëtarë mendojnë se nuk kanë blerë fare biletë, edhe pse pagesa është kryer me sukses.

Sipas SBB, funksioni është menduar kryesisht për persona që nuk përdorin smartphone, si fëmijët apo të moshuarit. Gjatë kontrollit, stafi skanon kartën SwissPass dhe sistemi konfirmon se udhëtimi është i paguar, edhe nëse bileta nuk është e dukshme për vetë përdoruesin.

Të dhënat tregojnë se më pak se 0.5% e biletave shiten përmes këtij opsioni, ndërsa kompania nuk planifikon ndryshime të mëdha në ndërfaqe, pasi ankesat kanë qenë të pakta.

SBB sqaron se në makinë ofrohen dy zgjedhje të qarta: biletë e printuar ose ngarkim në SwissPass. Fatura e printuar shërben vetëm si dëshmi pagese dhe nuk është biletë valide për udhëtim.

Udhëtarët që duan të kenë biletën të dukshme në aplikacion këshillohen ta blejnë atë drejtpërdrejt përmes telefonit mobil, për të shmangur konfuzionin gjatë udhëtimit.