Futbollistët e Kosovës e bëjnë me shtëpi një familje në nevojë

Futbollistët e Kosovës kanë filluar ndërtimin e një shtëpie për një familje në nevojë.

Ata, së bashku me Shoqatën Humanitare “Jetimat e Ballkanit”, kanë vizituar familjen që do t’i dhurojnë shtëpinë, përcjell albinfo.ch.

Kapiteni Samir Ujkani, Milot Rashica dhe Mërgim Vojvoda, së bashku me ndihmëstrajnerin Muharrem Saiti dhe humanistin Halil Kastrati, ishin mysafirë te shtëpia e rrënuar e tyre dhe ua dhanë lajmin e gëzueshëm.

“Emocione dhe lot gëzimi. Për hajr nisja e ndërtimit të shtëpisë së re. Kombëtarja e Kosovës në futboll me krejt stafin e saj janë donatorë të vetëm të kësaj shtëpie.

Para një muaji na thirrin në telefon dhe na tregojnë se e kemi bërë pagesën e një shtëpie komplet në konton e shoqatës.

Ne familjen ua zgjodhëm dhe bashkë me disa lojtarë të përfaqësues sot ishim dhe ia bëmë surprizë lajmin se po bëhen me shtëpi të re.

Kombëtares i urojmë suksese dhe Zoti i shpërbleftë”, thuhet në njoftimin e shoqatës.

Edhe kapiteni Samir Ujkani është shprehur i emocionuar, duke ndihmuar familjen që kishte nevojë.