Gahr Store dhe Hoxhaj zotohen të thellojnë bashkëpunimin

Ministri i Punëve të Jashtme të Norvegjisë, Jonas Gahr Store, ka thënë se Kosova është një shtet evropian me zhvillim të hovshëm

Ministri i Punëve të Jashtme të Republikës së Kosovës, Enver Hoxhaj, ka pritur në vizitë zyrtare në Kosovë, ministrin e Punëve të Jashtme të Norvegjisë, Jonas Gahr Store.

Ministri Hoxhaj dhe homologu i tij Jonas Gahr Store, janë pajtuar që Kosova dhe Norvegjia të thellojnë bashkëpunimin e tyre edhe sa i përket integrimit të Kosovës në institucionet euro-atlantike dhe fuqizimit të investimeve nga jashtë. Me këtë rast, ministri Hoxhaj ka thënë se “do të bëhen përpjekje që ndërmjet Kosovës dhe Norvegjisë të vendoset një komunikim në baza të rregullta.”

Në anën tjetër, ministri i Punëve të Jashtme të Norvegjisë, Jonas Gahr Store, ka thënë se Kosova është një shtet evropian me zhvillim të hovshëm, duke shprehur përkrahjen e shtetit të tij në të gjitha aspektet.

Ai, po ashtu, ka thënë se Qeveria norvegjeze po ndihmon Kosovën me fonde qeveritare dhe se kjo ndihmë është e fokusuar në tri drejtime: sistemin ligjor, edukim dhe krijimin e ambientit për investime të huaja private në Kosovë.