Gashi po shkëlqen në Amerikë

Ky ishte goli i katërt për sulmuesin e përfaqësues kuqezi në këtë sezon të Major League Soccer ndërkohë që Gashi numëron dhe tre asistime

Përballë milionave të Los Angeles Galaxy dhe futbollistëve të njohur të skuadrës kaliforniane, ia ka dalë të spikasë një shqiptar si Shkëlzen Gashi, shkruan albinfo.ch.

Protagonisti i kombëtares kuqezi shënoi një gol vërtet të bukur në sfidën e MLS-së, duke entuziazmuar mijëra të pranishmit të “StubHub Center”.

Në një 90-minutësh, ku Colorado Rapids dhe Los Angeles Galaxy luftonin për pikë të vyera në betejën për kampionatin, u bënë protagonistë mesfushori anglez Steven Gerrard dhe portieri veteran, Tim Howard, por kulmi i sfidës ishte Shkëlzen Gashi.

Me një goditje nga distanca, sulmuesi kosovar befasoi gardianin e formacionit kalifornian, duke fituar dhe përgëzimet e lojtarëve si Robbie Keane, Ashley Cole apo Gerrard. Los Angeles Galaxy barazoi më pas me Daniel Steres, ndërsa Gashi u shpall lojtari më i mirë i sfidës.

Ky ishte goli i katërt për sulmuesin e përfaqësues kuqezi në këtë sezon të Major League Soccer ndërkohë që Gashi numëron dhe tre asistime.

Pas këtij barazimi Colorado Rapids mban vendin e dytë në Konferencën e Perëndimit me tre pikë më pak se Dallas që kryeson, por skuadra nga Denveri ka dy ndeshje më tepër për të zhvilluar.