Gati 1 milion pasagjerë vetëm në muajin qershor, në Aeroportin e Tiranës

Rritet fluksi i pasagjerëve në Aeroportin e Tiranës - TIA: Milano, Londra, Roma janë destinacionet e preferuara

Referuar statistikave të fundit, Aeroporti Ndërkombëtar i Tiranës vijon të shënojë rritje në numrin e pasagjerëve dhe të destinacioneve ajrore, përcjell albinfo.ch.

Vetëm gjatë muajit qershor 2025, në këtë aeroport janë realizuar 6.170 fluturime drejt 84 destinacioneve në 24 shtete, ndërsa janë pritur 999.688 pasagjerë.

Këto të dhëna reflektojnë zgjerimin e rrjetit ajror që lidh Shqipërinë me pjesën tjetër të Europës dhe më gjerë, duke i dhënë më shumë alternativa udhëtimi si pasagjerëve vendas ashtu edhe atyre të huaj.

Ky muaj shënoi edhe rikthimin e disa destinacioneve të preferuara. Referuar të dhënave nga Aeroporti Ndërkombëtar i Tiranës, top 5 destinacionet më të kërkuara mbeten Milano, Londra, Roma, Bolonja dhe Venecia.

Ndërkohë, rritjen e fluksit të pasagjerëve e konfirmojnë edhe të dhënat zyrtare nga INSTAT, ku në tremujorin e parë të vitit 2025 kanë udhëtuar me linja ajrore 2 milionë pasagjerë, duke shënuar një rritje prej 9.1% krahasuar me të njëjtën periudhë të vitit të kaluar.

Nga ana tjetër, në transportin ajror gjatë tremujorit të parë të 2025 kanë operuar 19 shoqëri ajrore, ku 18 prej tyre janë shoqëri të huaja dhe vetëm një është shoqëri shqiptare. Në hapësirën ajrore shqiptare kanë fluturuar 65.146 avionë, nga të cilët 79.5% e zë numri i mbikalimeve. Këto shifra dëshmojnë qartë rritjen e kërkesës për udhëtime.

---