Gati marrëveshja për veriun

Kryeministri Hashim Thaçi njoftoi Qeverinë se është në prag të arritjes së marrëveshjes për shpërbërjen e strukturave ilegale në veri

Kryeministri Hashim Thaçi ka njoftuar të mërkurën kabinetin qeveritar për takimin e fundit që ka zhvilluar në Bruksel, me homologun serb Ivica Daçiq, duke thënë se një marrëveshja për shpërbërjen e gjitha strukturave ilegale në veri është gati të realizohet. Ai tha se procesi dialogues është komplikuar.

Kryeministri garantoi qeverinë se Asociacioni i komunave me shumicë serbe në Kosovë, do të formohet gjithnjë në përputhje me Kushtetutën, Ligjin për Vetëqeverisje Lokale dhe dokumentin e Ahtisarit. Ai ripërsëriti se ky mekanizëm do ta ketë Rregulloren e Punës, të ngjashme sikurse të Asociacioneve tjera në Kosovë.

“Bashkëngjitja apo largimi prej një mekanizmi tjetër në një komunë të veçantë, do të jetë krejt në baza vullnetare, por që ky mekanizëm në asnjë rrethanë nuk do të ketë karakter apo mandat legjislativ, as ekzekutiv apo të ndonjë pushteti të tretë”, tha kryeministri Thaçi.

Shefi i qeverisë kosovare tha se në asnjë rrethanë nuk do të ketë status special, autonomi për serbët në veri, ndarje të Kosovës, apo Ahtisari Plus, madje ai tha se diçka e tillë as që është kërkuar.

“Gjërat e tilla asnjëherë nuk janë ngritur në takimet që kam zhvilluar, dhe as që do të tolerohet t`i ngrejë dikush, e lëre më të përfshihen në marrëveshje apo të implementohen në territorin e Republikës së Kosovës. E kuptoj edhe të qenit të pa informuar, por informimi ka qenë maksimal me transparencë të plotë si në asnjë proces tjetër”, tha ai.

Kryeministri Thaçi ka ironizuar me zërat kritikë që po shfaqen në Kosovë, rreth procesit të dialogut, sidomos ata të Lëvizjes Vetëvendosje, duke i ftuar që të lexojnë me kujdes Kushtetutën, ligjet e Kosovës, pakon e Ahtisarit dhe Ligjin për Vetëqeverisje Lokale.

Thaçi tha se gjërat janë duke lëvizur në drejtim të duhur edhe sa i përket sistemit të drejtësisë dhe mbajtjes së zgjedhjeve në katër komunat veriore. Takimi i ardhshëm i kryeministrit Hashim Thaçi dhe atij serb, Ivica Daçiq, do të ndodhë më 20 mars, ku pritet të arrihet marrëveshja për zhbërjen e strukturave ilegale serbe në veri.