Gjakova tërheq bashkatdhetarët

Kryerja e Gjakovës, Mimoza Kusari-Lila ka takuar bashkatdhetarët që po qëndrojnë në vendlindje dhe ka kërkuar ndihmën e tyre për zhvillimin e Gjakovës

Kryetarja e Komunës së Gjakovës, Mimoza Kusari-Lila ka njoftuar bashkatdhetarët me zhvillimet politike dhe ekonomike në Gjakovë, ndërsa ka kërkuar nga ta që të investojnë në qytetin e tyre. Ajo ka takuar mërgimtarët që po qëndrojnë në vendlindje dhe ka kërkuar ndihmën e mërgimtarëve për zhvillimin e Gjakovës.

Kusari Lila i ka njoftuar bashkatdhetarët me sfidat nëpër të cilat gjendet Komuna, duke u nisur nga sfida për realizime të projekteve kapitale, borxhi i trashëguar nga ish qeverisja, projektet të cilat kanë ngelur të papërfunduara, e të tjera.

Ajo u tha bashkatdhetarëve se për periudhën e deritanishme është arritur që nga borxhet e trashëguara të shlyhen rreth 2.8 milionë euro.

Mërgimtarët nga kryetarja Kusari-Lila janë njoftuar për shpalljen e Gjakovës si zonë të lirë ekonomike i cili ende nuk është tërësisht funksional ku aspirohen prodhime me kosto më të ulët, pastaj ‘Parku i Biznesit’, që pas kërkesës së parashtruar AKP-së pritet përgjigje prej tyre, si dhe për nisma tjera me synime dhe objektiva ekonomike.

Gjithashtu në fokusim kanë qenë edhe investimet aktuale në renovimin e Pallatit të Kulturës “Asim Vokshi”, për kulturën në përgjithësi, sportin, me theks të posaçëm futbollin ku planifikohet që stadiumi të shndërrohet në ndërmarrje komunale publike, pastaj planifikimi për ambientin, hapësirat e gjelbra, si dhe projekte të tjera.

Nga mërgimtarët janë parashtruar kërkesa të ndryshme që kryesisht kanë pasur të bëjnë me rregullimin e ambientin, ndërtimet, uzurpimet si dhe me çështje të tjera që kanë të bëjnë me infrastrukturë.

Mërgimtarët kanë dhënë edhe vlerësime për punën e deritanishme dhe objektivat e shprehura nga kryetarja e Komunës, ku është falënderuar për investimet në renovimin dhe rikthimin e Galerisë së Arteve, ligjshmërinë, dhe të tjera cilësime.