Gjenevë: Macron dhe Merkel, në 100-vjetorin e ILO-së

Organizata Ndërkombëtare e Punës (ILO), e themeluar pas përfundimit të Luftës së Madhe më 1919, është i vetmi krijim i Traktatit të Versajës që ka mbijetuar deri tani. 

Konferenca e ardhshme vjetore për punën që nis të hënën në Gjenevë do të kulmojë me dy tekste kryesore. Një Konventë për Ngacmimet në Punë dhe një deklaratë për të ardhmen e punës përballë sfidave të reja, si ndryshimi klimatik dhe teknologjitë e reja e inteligjenca artificiale, shkruan atsh, përcjell albinfo.ch. 

Takimi, i cili do të zgjasë deri më 21 qershor, do të çelet me praninë e drejtorit të ILO, britanikut Guy Ryder. Krerët e shteteve dhe qeverive do të marrin fjalën në fillim dhe në fund të këtyre dy javëve të konferencës. Presidenti francez, Emmanuel Macron, kancelarja gjermane, Angela Merkel dhe kryeministri rus, Dmitri Medvedev, parashikohen të jenë të pranishëm më 11 qershor.