Gjermani: Sulmohet me molotov një sinagogë në Berlin

EPA/THOMAS BANNEYER

Një qendër e komunitetit hebre dhe një sinagogë në Berlin u goditën me dy pajisje ndezëse artizanale, në një sulm sot paradite, duke shkaktuar frikë dhe zemërim në mesin e komunitetit hebre të kryeqytetit gjerman.

Komuniteti Kahal Adass Yisroel shkroi se ”sulmues të panjohur hodhën dy kokteje molotov nga rruga në drejtim të qendrës së tyre të komunitetit në Brunnenstrasse, në lagjen Mitte të Berlinit”.

Shishet shpërthyen dhe u dogjën, por nuk shkaktuan lëndime apo dëmtime në ndërtesë.

Gazeta lokale ”Tagesspiegel” raportoi se koktejet molotov u dogjën në trotuar.

Oficerët e policisë të ngarkuar me sigurimin e qendrës hebraike ishin të pranishëm gjatë tentativës për zjarrvënie, por nuk arritën të arrestonin autorët.