Gjermania hedh poshtë propozimin e SHBA-së për të hequr dorë nga patentat e vaksinave

Ideja u propozua fillimisht nga India dhe Afrika e Jugut, të cilët kanë udhëhequr një grup prej rreth 60 vendeve në Organizatën Botërore të Tregtisë (OBT), një organ ndërqeveritar që promovon tregtinë globale. Grupi po bën presion për heqjen e përkohshme të mbrojtjes së pronës intelektuale mbi vaksinat

Gjermania ka shprehur kundërshtim ndaj një propozimi të mbështetur nga SHBA për të hequr dorë nga patentat për vaksinat Covid-19, duke thënë se ato nuk po pengonin prodhimin e dozave.

Qeveria e saj tha se “mbrojtja e pronës intelektuale është një burim inovacioni dhe duhet të mbetet e tillë”.

Bashkimi Evropian më herët tha se ishte gati të fliste për propozimin dhe disa shtete i dhanë mbështetjen e tyre të plotë, raporton Cnn, përcjell Albinfo.ch.

Mbështetësit e planit thonë se ai do të lejojë më shumë prodhues të prodhojnë vaksina që shpëtojnë jetën. Ata argumentojnë se kjo do të rrisë qasjen në vaksina në vendet e varfra.

Por kundërshtarët, përfshirë prodhuesit e ilaçeve, thonë se mund të mos ketë efektin e dëshiruar.

Ideja u propozua fillimisht nga India dhe Afrika e Jugut, të cilët kanë udhëhequr një grup prej rreth 60 vendeve në Organizatën Botërore të Tregtisë (OBT), një organ ndërqeveritar që promovon tregtinë globale. Grupi po bën presion për heqjen e përkohshme të mbrojtjes së pronës intelektuale mbi vaksinat.

Ideja hasi kundërshtim të fortë nga administrata e mëparshme amerikane e Donald Trump, si dhe Mbretëria e Bashkuar dhe BE, por mori hov këtë javë pasi SHBA e mbështeti atë.

---