Gjermania ndalon bartjen e ferexhesë, pritet ta bëjë edhe Austria

Pas sulmeve të fundit terroriste në Gjermani, Ministria e Brendshme është duke menduar për një sërë masash legjislative, të cilat do të shërbejnë në luftën anti – terror.

Ministri i Brendshëm gjerman, Thomas de Maiziere, më 18 gusht do të nënshkruajë një deklaratë, në të cilën parashikon ndalimin e burkës (ferexhesë), rritje të forcave të policisë, ndalimin e dhënies së shtetësisë së dyfishtë si dhe dëbimin e sa më të shpejtë të personave të cilët nuk kanë leje qëndrim në Gjermani, raportojnë mediat gjermane.

“Në fakt, unë jam kundër këtyre ndalesave, por unë e shoh në aspektin anti – terror. Ndalimi i bartjes së ferexhesë mendoj se është në të mirën e njerëzve, për shkak se në vendet publike secili person duhet të jetë i identifikueshëm”, ka thënë, ndër të tjera, ministri i Brendshëm gjerman, njofton albinfo.ch.

Sipas mediave gjermane, në pakon e saj të reformave legjislative pritet të ketë kontroll shumë të rreptë ndaj financimit të xhamive dhe organizatave joqeveritare, të cilat i kanë cilësuar si një ndër burimet e rrezikshme të financimit të terroristëve brenda në Gjermani.

Për ndalimin e bartjes së ferexhesë është duke u diskutuar edhe në Austri. Gazeta heute.at ka bërë një sondazh me lexuesit e saj, ku prej mbi 5200 personave që kanë votuar deri tash, 94 % kanë votuar pro, ndërsa vetëm rreth 6 % janë kundër kësaj iniciative.