Gjermania paralajmëron gazetarët të mos udhëtojnë në Turqi

Ilustrim, Pixabay

Sindikata e Federatës Gjermane të Gazetarëve (DJV) ka këshilluar profesionistët e medias kundër udhëtimeve profesionale dhe private në Turqi, pas arrestimit të përkohshëm të një ligjvënëseje gjermane në fillim të këtij muaji.

“Arrestimi i Gökay Akbulut pasi hyrjes së saj në Turqi në fillim të gushtit tregon edhe një herë se autokracia e presidentit turk, Recep Tayyip Erdogan, i konsideron kritikët e tij si armiq militantë të shtetit dhe i persekuton kur ka mundësi ta bëjë këtë”, tha sot Frank Überall, kryetari kombëtar i DJV-së në një deklaratë.

Nëse imuniteti parlamentar nuk të mbron kundër arrestimeve, rreziku për gazetarët është edhe më i madh, shtoi ai.

“Akbulut, një ligjvënëse nga Partia e Majtë e Gjermanisë, u arrestua në Turqi më 3 gusht. Një urdhërarrestim, i cili më vonë u anulua nga autoritetet turke, ishte lëshuar për propagandë të dyshuar terroriste”, tha Akbulut për “Mannheimer Morgen”, transmeton dpa, përcjell albinfo.ch.

Politikania me origjinë turke, e cila, sipas saj, është me prejardhje kurdo-alevi, është anëtare e Bundestagut që nga viti 2017.

Ajo ka qenë vazhdimisht kritike ndaj qeverisë turke dhe po bën fushatë për heqjen e ndalimit gjerman mbi aktivitetet e Partisë së Punëtorëve Kurdë PKK. PKK është klasifikuar si organizatë terroriste në Turqi dhe në Bashkimin Evropian.

Pas arrestimit të saj, Ambasada gjermane në Ankara dhe Ministria e Jashtme Gjermane kishin ndërhyrë, duke ndihmuar në lirimin e saj.