Gjuha shqipe në Zvicër, tema qendrore e numrit më të ri të revistës albinfo.ch

Numri më i ri i revistës albinfo.ch, i cili nga sot është në duart e lexuesve, temë bosht ka gjuhën shqipe në Zvicër, gjegjësisht statusin që gëzon ajo në këtë shtet me një numër të madh shqiptarësh.

Pak kohë më parë, në kryetitujt e mediave zvicerane kishte zënë vend lajmi se gjuha shqipe është e dyta për nga numri i folësve të saj në Zvicër, menjëherë pas anglishtes. Në fakt, lajmi mori shkas nga rezultati që kishte publikuar Zyra Federale e Statistikave, sipas të cilit shqipja tashmë e kalonte portugalishten, e cila deri më tani ishte e para (pas anglishtes) në mesin e gjuhëve të komuniteteve të huaja në Zvicër.

Redaksia jonë, duke u nisur nga kjo informatë, ka realizuar një numër artikujsh, në përpjekje për të “zbardhur” gjendjen dhe statusin aktual të shqipes në shtetin helvetik.

Për të arritur tek një e vërtetë sa më e saktë në këtë drejtim, ne kemi intervistuar disa nga personalitetet më kompetente për gjuhën shqipe në Zvicër, si: Prof. Dr. Basil Schader, profesor iuniversitar në pension, albanolog dhe gjermanist i njohur zviceran, Prof. Dr. Naxhi Selimin, docent për gjermanishten si gjuhë e dytë në Universitetin e Schwyz-it dhe Dr. Cristiana Lucchetti, punonjëse shkencore në seminarin e sllavistikës në kuadrin e Universitetit të Cyrihut, e cila po udhëheq një projekt mbi gjuhët e Ballkanit në Zvicër, ku shqipja zë vend qëndror.

Krahas  intervistave, janë edhe dy editoriale dhe një artikull qendror që i kushtohen gjuhës shqipe në stadin e saj aktual, në Zvicër.

Përveç bllokut të temave për gjuhën shqipe, ky numër i revistës sonë i ka bërë vend edhe temës gjithmonë aktuale për shqiptarët e këtushëm: fluturimit gjegjësisht udhëtimit nga Zvicra në vendlindje dhe anasjelltas. Në këtë kontekst, për lexuesit tanë kemi prezantuar portrete interesante me dy stjuardesa shqiptare dhe kemi “zbuluar” se kush qëndron prapa zërit të ëmbël që na shqoëron  saherë që fluturojmë me kompaninë ajrore Chair…

Veç temave të përmendura, ky numër i revistës përmban edhe artikuj të tjerë interesantë dhe rubrikat standarde.