Gjykata federale: Nuk përsëritet votimi për dëbimin e të huajve

Shpalljen të pavlefshëm të votimit e kishte kërkuar, përmes një ankese të dërguar në këtë gjykatë, një qytetar nga Soloturni

Gjykata Federale e Zvicrës me seli në Lozanë ka ardhur në përfundimin se votimi popullor i mbajtur vitin e kaluar, i mbiquajtur “votimi mbi iniciativën për dëbimin e të huajve kriminelë” ka qenë i rregullt dhe i vlefshëm.

Si rrjedhojë, ai nuk do të përsëritet, shkruan nzz.online.

Shpalljen të pavlefshëm të votimit e kishte kërkuar, përmes një ankese të dërguar në këtë gjykatë, një qytetar nga Soloturni. Ai, veç tjerash,  ishte ankuar se SVP gjatë fushatës për votim i kishte informuar në mënyrë të mangët votuesit lidhur me problemet që ka kjo iniciativë me të drejtën ndërkombëtare. 

Ndërsa, në përgjigjen e saj, Gjykata Federale ka thënë se është në të drejtën e partive politike që interesat e tyre t`i përfaqësojnë në frymë polemizuese.

Nga ana tjetër, vazhdon shkresa e gjaktës, qytetari me të drejtë vote secilën herë merr nga Qeveria Federale  informacione të mjaftueshme lidhur me përmbajtjen e iniciativës së caktuar për votim.