Gjykata Federale ua njeh refugjatëve pensionin e invaliditetit për fëmijët jashtë vendit

Konkretisht, një refugjat afrikan, me vendimin e ri, ka të drejtë të marrë një pension invaliditeti për dy vajzat e tij, edhe pse ato jetojnë jashtë Zvicrës

Gjykata Federale e Zvicrës ka marrë një vendim të rëndësishëm në lidhje me trajtimin e refugjatëve me status të njohur azili. Ajo i ka dhënë të drejtë një refugjati të pranuar (me prejardhje nga Çadi, Afrikë) në kontestin që ai kishte me Sigurimin e Invaliditetit, në Zvicër, shkruan sda.ch.

Konkretisht, refugjati me vendimin e ri, ka të drejtë të marrë një pension invaliditeti për dy vajzat e tij, edhe pse ato jetojnë jashtë Zvicrës.

Në vendimin e saj, Gjykata Federale ka vendosur të drejtën ndërkombëtare mbi atë vendore, të Zvicrës, transmeton albinfo.ch. Konventa ndërkombëtare për Refugjatët u garanton refugjatëve të pranuar, të drejta të barabarta me ato të qytetarëve të vendeve përkatëse, sa u përket sigurimeve sociale. Në këtë kontekst, hyjnë edhe pensionet e invaliditetit që lidhen me rastin konkret.

Për qytetarët zviceranë, kur është fjala për pensionet invalidore për fëmijë, nuk shikohet nëse fëmijët jetojnë në Zvicër ose jashtë saj. Të gjithë e kanë këtë të drejtë të pacenueshme, përcjell albinfo.ch. Rrjedhimisht, kjo e drejtë u takon edhe fëmijëve të refugjatëve.

Për këtë arsye, zyra përgjegjëse e pensioneve të invaliditetit duhet të merret edhe njëherë me rastin.

Refugjati i përmendur jeton në Zvicër që nga viti 1994, kur dhe i është njohur statusi i refugjatit. Nga viti 2005 ai merr pension invaliditeti, transmeton albinfo.ch. Kur, në vitin 2016 ai kishte kërkuar ndihma për dy vajzat e tij jashtëmartesore që jetojnë në Francë, qendra përgjegjëse për Pensionet e Invaliditetit në Bernë, kishte hedhur poshtë kërkesën.

---