Gjykata, kundër Parlamentit: I jep pasaportën të riut që ka vjedhur 122 sfr

(KEYSTONE/Christian Beutler)

Në një procedurë ankimimi, Gjykata e Lartë (kantonale) e Aargaut ka natyralizuar një shtetas të huaj të ri kundër vullnetit të Parlamentit kantonal, transmeton albinfo.ch. Parlamenti kishte refuzuar kërkesën e të riut 18-vjeçar për shkak se ai më parë kishte kryer tri vjedhje, me vlerë të gjiothmbarshme prej 122,90 CHF.

Vendimi i Parlamentit kantonal tani po rezulton i “paqëndrueshëm”, sipas vendimit të Gjykatës Administrative të publikuar të hënën. Parlamenti nuk kishte dëshmi të mjaftueshme për të arsyetuar refuzimin e kërkesës.

Parlamenti me këtë rast ishte mbështetur në mënyrë të njëanshme në kriterin e shkeljes, shkruan sda.ch. Në moshë të mitur, i huaji i ka kryer vjedhjet në një dyqan në tri ditë të njëpasnjëshme. Kjo kishte bërë që prokuroria e të rinjve ta akuzonte atë për shkelje.

“Në këto rrethana, refuzimi i kërkesës së ankuesit mund të klasifikohet si pothuajse arbitrar”, thotë Gjykata Administrative në shqyrtimet e saj. I riu nuk ka kryer incidente të tjera, përcjell albinfo.ch. Kështu, Parlamenti i Kantonit të Aargaut duhet t’i rimbursojë ankuesit shpenzimet e mbrojtjes prej 2000 CHF të bëra përpara Gjykatës Administrative.

Në qershor, pas një diskutimi të gjerë, parlamenti kishte vendosur me 74 vota kundër dhe 50 Pro të mos natyralizonte të riun e huaj. Partitë e djathta si SVP, FDP dhe pjesë të mëdha të Partisë së Qendrës kishin votuar kundër natyralizimit ndërsa – PS, të Gjelbrit dhe GLP ishin pro. Sjellja e të riut ishte “mosrespektuese dhe arrogante”, kishin thënë deputetët e  FDP.

Komisioni i natyralizimit i parlamentit, i cili duhet të shqyrtojë vendimet pozitive të komunave, ishte shprehur kundër miratimit të kërkesës. Por në mars, me kërkesë të grupit parlamentar të PS-së, Kuvendi vendosi ta marrë këtë kërkesë dhe ta shqyrtojë sërish.

Në përpjekjen e dytë, Komisioni arriti në përfundimin se një refuzim i kërkesës do të ishte “disproporcional”. Komuna e kishte siguruar aplikantin për shtetësinë në nivelin komunal, që në dhjetor të vitit 2020.

I riu i huaj, i cili aktualisht po përfundon një stazh profesional si polimekanik, ishte kapur duke vjedhur në një dyqan në pranverën e vitit 2021. Ai ka vjedhur një “adaptues” USB me vlerë 19,95 franga dhe një këmishë mashkulli me vlerë 34,95 franga.

Kur qe marrë në pyetje, ai i kishte thënë policisë se dy ditë më parë kishte marrë me vete një bluzë me vlerë 34 CHF pa paguar, transmeton albinfo.ch. Ai është sanksionuar nga prokurori i të rinjve me 100 franga gjobë. (Aktgjykimi WBE.2022.320 i 3 tetorit 2022).