Gjykata Speciale: Deri më 12 qershor, ekipet e mbrojtjes dorëzojnë mocion për rrëzimin e aktakuzës

Ekipet e mbrojtjes të katër ish-krerëve të Ushtrisë Çlirimtare të Kosovës: Hashim Thaçi, Kadri Veseli, Jakup Krasniqi dhe Rexhep Selimi,  kanë afat deri më 12 qershor për të dorëzuar një mocion të përbashkët në Gjykatën Speciale në Hagë për rrëzimin e disa ose të gjitha pikave të aktakuzës ndaj tyre, transmeton albinfo.ch.

Sipas një vendimi të publikuar nga Dhomat e Specializuara, mocioni i mbrojtjes pritet të mbështetet në rregullën 130 të procedurës dhe do të përmbajë kundërshtime mbi bazën ligjore të vazhdimit të procesit, si dhe kërkesa të tjera procedurale që mund të çojnë në hedhjen poshtë të akuzave.

Fillimisht, Trupi Gjykues kishte caktuar datën 14 korrik si afatin për dorëzimin e përgjigjes nga ana e Zyrës së Prokurorit të Specializuar (ZPS), por më pas vendosi ta shkurtojë këtë afat deri më 7 korrik.

“Trupi Gjykues urdhëroi ekipet e mbrojtjes të dorëzojnë mocionin e përbashkët në përputhje me rregullën 130, deri më 12 qershor, ndërsa ZPS-ja u urdhërua të dorëzojë përgjigjen e saj deri më 14 korrik. Megjithatë, në këtë vendim, Trupi Gjykues e gjeti të përshtatshme të zvogëlojë afatin kohor për përgjigjen e Prokurorisë më 7 korrik”, thuhet në dokumentin zyrtar, transmeton albinfo.ch.

Avokati Ardian Bajraktari, duke komentuar për zhvillimet e fundit, ka thënë se një rrëzim i tërësishëm i aktakuzës do të përbënte një epilog të mundshëm për këtë proces të gjatë dhe, siç e cilësoi ai, të mbushur me “shkelje të shumta”.

“Referuar asaj që është parë deri më tash, rrëzimi i tërësishëm i pikave të aktakuzës do të ishte epilog real i përfundimit të këtij procesi të stërzgjatur dhe me shkelje të shumta. Vlerësoj që së paku në shkallën e parë të përfundojë brenda këtij viti ose vitin e ardhshëm më së largu”, deklaroi ai.

Gjatë dy viteve të zhvillimit të gjykimit, mbi 125 dëshmitarë të thirrur nga Prokuroria e Specializuar kanë dëshmuar në lidhje me akuzat për krime lufte dhe krime kundër njerëzimit që rëndojnë mbi katër të akuzuarit.

Në tetor të vitit 2020, aktakuza ndaj Thaçit, Veselit, Krasniqit dhe Selimit ishte konfirmuar, duke i ngarkuar ata me përgjegjësi si pjesë e një “ndërmarrjeje të përbashkët kriminale”, që sipas Prokurorisë, kishte për qëllim shënjestrimin e atyre që konsideroheshin “kolaboracionistë” apo “tradhtarë”, për të fituar kontroll politik gjatë dhe pas luftës.

Avokatët e tyre e kanë mohuar çdo përfshirje në veprime të tilla, duke theksuar se Ushtria Çlirimtare e Kosovës nuk ka pasur një strukturë komanduese të centralizuar dhe se akuzat janë të pabazuara, transmeton albinfo.ch.