Ulen dënimet e kosovarëve të akuzuar për skllavërim të grave: Mungojnë faktet

Gjykata e Lartë e ka rrëzuar ankesën e ish bashkëshorteve. Kryetari i trupit gjykues thotë se deklaratat e dy grave për skllavërim, nuk janë të besueshme

Në procesin gjyqësor për trafikim të dyshuar njerëzor, të zhvilluar të mërkurën, Gjykata e Lartë (kantonale) e Bernës ka ulur dënimet e tre anëtarëve meshkuj të një familjeje nga Kosova. Kështu, ankesa e dy ish-grave, u rrëzua nga gjykata.

Kryefamiljari dhe dy djemtë janë paraqitur para Gjykatës së Lartë. Sipas akuzës, “patriarku” i familjes ka aranzhuar martesat e katër djemve të tij duke sjellë në Zvicër vajza të mitura nga Ballkani me avion, transmeton albinfo.ch. Pasi martoheshin, gratë, sipas akuzës, se mbaheshin në kushte skllavërie në Jura të Bernës.

Rasti pati shkaktuar një bujë mbarëkombëtare në vitin 2022. Thuhej se familja funksiononte sipas ligjit zakonor mesjetar shqiptar (kanunit), shkruan swissinfo.ch. Megjithatë, Gjykata Regjionale në Moutier nuk i dënoi ata për trafikim qeniesh njerëzore ose përdhunim. Provat nuk ishin të mjaftueshme për këtë.

Babai dhe njëri nga djemtë janë dënuar në shkallën e parë vetëm me dënime me burgim me kusht – babai për shkelje të Ligjit për të Huajt, djali për veprime seksuale me të mitur. Një djalë tjetër mori një gjobë me kusht për fyerje dhe kërcënime, përcjell albinfo.ch. Dy djem u liruan nga akuzat.

Dy ish-bashkëshortet i kishin konsideruar dënimet shumë të buta dhe e çuan çështjen më tej. “Nuk jam trajtuar si njeri, por si objekt”, ka thënë njëra prej tyre, në cilësinë e paditëses, në gjykatë të mërkurën. “Ai më rrihte me rrip”, ka shpjeguar gruaja e dytë.

Avokati i saj ka folur për fyerje, kërcënime, izolim, lëndime fizike dhe presion psikologjik. Dy gratë, sipas tij ishin degraduar në skllave seksi. Ai ka argumentuar tutje se vlerësimi i provave në vendimin e shkallës së parë kishte mangësi serioze. Nevojitet një gjykim më i barazpeshuar.

Kryefamiljari, duke folur në Gjykatën e Lartë, gjithashtu i ka mohuar akuzat kundër tij. Dy djemtë e tij të bashkëpandehur pohuan se nuk kishin përdorur kurrë dhunë apo shtrëngim. Zyra e Prokurorit të Përgjithshëm Publik nuk ishte e përfshirë në procedurat e shkallës së dytë.

Gjykata e Lartë e ka rrëzuar ankesën e ish bashkëshorteve. Kryetari i trupit gjykues deklaroi në vendimin e tij se ngjarjet ndodhën me dyer të mbyllura. Pra, asnjë person i jashtëm nuk e di se çfarë po ndodhte. Megjithatë, deklaratat e dy paditëseve nuk janë të besueshme, sipas tij, transmeton albinfo.ch. Ekzistojnë dyshime të forta rreth imazhit të përshkruar nga to, si femra të skllavëruara.

Gjobat janë ulur me dhjetë përqind. Për babanë e familjes, për shembull, kjo do të thotë që dënimi me burgim me kusht për shkelje të Ligjit për të Huajt u ul nga 150 në 135 ditë.

---