Goli i Xhakës i siguroi Zvicrës fitoren kundër Sllovenisë

Golin e fitores, një gol shumë të bukur e ka shënuar Granit Xhaka në minutën e 74 nga një pozicion i vështirë

Zvicra ka fituar edhe ndeshjen e radhës, atë kundër Sllovenisë, të luajtur në Bernë. Golin e fitores, një gol shumë të bukur, e ka shënuar Granit Xhaka në minutën e 74 nga një pozicion i vështirë.

Ndonëse përfaqësuesja zvicerane e ka siguruar tashmë pjesëmarrjen në Botërorin e vitit 2014 në Brazil, edhe kjo ndeshje e ka rëndësinë e vet. Nga fitorja varej vënia e saj në grupin e parë, të favorizuar të kampionatit. Zvicra po i përfundon pra kualifikimet pa shënuar asnjë humbje në 14 ndeshje me radhë.

Sllovenia me këtë humbje i ka humbur shanset për kualifikim në barazh.

Në ndeshje janë inkuadruar nga fillimi lojtarët shqiptarë: Xhemaili, Xhaka dhe Mehmedi, ndërsa nga minuta e 71 është inkuadruar edhe Pajtim Kasami. Me Shaqirin, për shkak të lëndimit të pësuar  në ndeshjen me Shqipërinë, nuk është llogaritur, ndërsa nuk ka luajtur as Behrami.

Kombëtarja zvicerane ka bërë një lojë superiore ndaj asaj sllovene. Ndërsa sidomos pas shënimit të golit nga Xhaka, janë shpeshtuar shanset e zviceranëve për gol. Pikërisht lojtarët me rrënjë shqiptare, si Xhaka, Kasami dhe Mehmedi kanë qenë protagonistë të këtyre shanseve që megjithatë mbetën të parealizuara.