Gordon Ramsey dhe bashkëshortja presin fëmijën e pestë

Familja e kuzhinierit yll Gordon Ramsey së shpejti do të rritet edhe për një anëtar të ri.

Kuzhinieri i famshëm ka njoftuar se ai dhe bashkëshortja e tij Tana janë duke e pritur fëmijën e pestë, në një video që e kanë postuar në Instagram. Derisa ua uruan Vitin e Ri mijëra ndjekësve, ai dhe bashkëshortja e tij Tana thanë se e presin edhe fëmijën e radhës.

Gordon dhe Tana tashmë kanë katër fëmijë, Meganin, Matildan dhe binjakët Jack e Hjolly. Duke folur me ndjekësit e vet në Instagram, Gordon megjithatë nuk e zbuloi gjininë e foshnjës, e as sa kohë mbeti deri në lindje.

Në vitin 2016 çifti kishte njoftuar se humbën një fëmijë, e që për 52-vjeçarin, siç kishte deklaruar, ishte diçka që e afroi familjen akoma më shumë. Përndryshe, nikoqiri i emisionit shumë të njohur Hell’s Kitchen ka kremtuar 22-vjetorin e martesës me Tanan muajin e shkuar.