Grabitje me armë në një bankë në Fushë Kosovë

Deri tani policia ka arritur të sekuestrojë një motor, që dyshohet se është përdorur prej të  dyshuarve, për tu larguar nga vendi i ngjarjes

Foto ilustrim

Policia e Kosovës njofton se sot rreth orës 10:00 të mëngjesit ka ndodhur një grabitje e armatosur në një bankë në rrugën “Nëna Terezë”  në Fushë Kosovë. Policia thotë se nga hetimet e para dyshohet se kjo grabitje është realizuar nga persona të dyshuar, të cilët kanë qenë të maskuar dhe të armatosur.

“Të dyshuarit pasi kanë grabitur një shumë të konsiderueshme parash, nën kërcënimin e armës (duke shtënë në ajër),  janë larguar nga vendi i ngjarjes. Për të konfirmuar shumën e parave të grabitura policia është duke punuar ngushtë me zyrtarë të bankës.

Deri tani policia ka arritur të sekuestrojë një motor, që dyshohet se është përdorur prej të  dyshuarve, për tu larguar nga vendi i ngjarjes. Ai po ekzaminohet nga njësitet përkatëse”, thuhet në njoftimin.

Policia kërkon nga qytetarët të cilët kanë ndonjë informacion lidhur me këtë rast të mbështesin policinë me informacionet e tyre për hetimin dhe zbulimin e këtyre akteve.