Grupi i shqiptarëve në Angli dënohet me 43 vjet burg

Të arrestuarit e kanë pranuar fajësinë për konspiracion dhe pastrim parash dhe kanë marrë gjykime të shkurtuara

Numri i të arrestuarve shqiptarë dhe të dënuarve në Britani të Madhe po rritet, derisa shumica e tyre akuzohen për shpërndarjen e drogës ose pastrim parash.

Sipas tabloidit “Daily Mail”, një tjetër grup trafikantësh, prej shtatë vetash, është dënuar në Londër me 43 vjet në total.

Në përpjekjet për të fshehur ngarkesat, korrierët e këtij grupi të strukturuar kriminal e fshihnin drogën në ambiente të ndërtuar enkas me sisteme hidraulike, ku mund të fshiheshin deri në 15 kg kokainë, shkruan “TCH”.

Detektivët e Agjencisë Britanike të Luftës Kundër Krimit, NCA, të cilësuar si më e afërta agjenci ligjzbatuese, me FBI-në amerikane, kanë mundur që nga ky grup, të cilin e mbanin në vëzhgim prej kohësh, të sekuestronin sasi të mëdha kokaine me vlerë 720 mijë funte, përcjell albinfo.ch.

Gjatë bastisjeve dhe arrestimeve janë kapur nga policia edhe sasi të mëdha parash të thata, në funte dhe euro, si dhe shumë pajisje për hollimin dhe peshimin e kokainës, u tha ne seancat në gjykatën Kingston Crown Court.

Të arrestuarit e kanë pranuar fajësinë për konspiracion dhe pastrim parash dhe kanë marrë gjykime të shkurtuara.