Guinea Conacry dhe Nigeri shtojnë numrin e njohjeve për Kosovën

Republika e Guinesë Conacry dhe Republika e Nigerit, janë shtetet e radhës të cilat e kanë njohur pavarësinë e Republikës së Kosovës

Letrat kredenciale i janë dhënë zëvendëskryeministrit të Kosovës, Behgjet Pacolli, i cili aktualisht po qëndron në Afrikë, ku është duke lobuar për shtimin e njohjeve të reja

Lajmin e bëri të ditur për mediet e Kosovës Jetlir Zyberaj, këshilltari i zëvendëskryeministrit Pacolli.

“Njohjet nga Nigeri dhe Guinea janë në përputhje të plotë me vullnetin e qytetarëve të këtyre dy shteteve si dhe me respekt të plotë për qytetarët e Kosovës për shtet të pavarur dhe sovran. Po ashtu këto dy njohje janë konform opinionit këshillëdhënës të Gjykatës Ndërkombëtare të Drejtësisë karshi pavarësisë së Kosovës”, është shprehur ai.

Këto njohje vijnë pas aktivitetit lobues të zëvendëskryeministrit Pacolli dhe numrin e njohjeve të pavarësisë së Kosovës e shtojnë në 79.

Behgjet Pacolli ndodhet në kontinentin e Afrikës tash disa ditë në mision lobues për njohjen e pavarësisë së Kosovës.