Hapet klasa e re shqipe në Herrliberg të Cyrihut

Të premten me datën 25 Shtator 2020 në Shkollën Herrliberg të Kantonit të Cyrihut u hap edhe një klasë e shkollës shqipe.

“Ky është lajm i gëzueshëm për fëmijët e këtij vendbanimi dhe fshatrat për rreth, me qëllim që edhe ata të kenë mundësinë të mësojnë në gjuhën amtare.”, thuhet në njoftimin e Shkollës Shqipe, përcjell albinfo.ch.

“Në hapjen e shkollës shqipe përveç mësueses Lenditë Alidema – Kokollari morën pjesë, edhe  prindërit si dhe vetë koordinatori i shkollave shqipe në Zvicër z. Vaxhid Sejdiu. Pas një prezantimi të shkurtër të mësueses Lenditë Alidema – Kokollari, dhe prezantimit të nxënësve filloi një bashkëbisedim me prindërit e kësaj ane të Liqenit të Cyrihut me qëllim që shkolla Shqipe në këtë vendbanim të organizohet sa më mirë.”, thuhet më tutje në njoftim, përcjell albinfo.ch, dhe bëhet e ditur se nxënësit kanë pranuar edhe tekstet shkollore të cilat tekste u pranuan para disa ditës në Ambasadën e Republikës së Shqipërisë, të dërguara nga ana e Qendrës së Botimeve për Diasporën.

Mësimi në këtë klasë të shkollës shqipe zhvillohet çdo të premte, edhe atë nga grupi i parë nga ora 15:30-17:00 dhe grupi i dytë 17:00-18:30.