Hapet për publikun varri i Papa Françeskut

Keystone (AP Photo/Luca Bruno)

Pas ceremonisë madhështore të varrimit, varri i Papa Françeskut u hap për publikun për herë të parë të dielën në mëngjes. Qindra besimtarë dhe vizitorë u rreshtuan që nga orët e para për të hyrë në Bazilikën e Santa Maria Maggiore, ku Papa i ndjerë ka zgjedhur të prehet, shkruan SRF, transmeton albinfo.ch.

Papa Françesku, i cili ndërroi jetë të hënën e Pashkëve në moshën 88-vjeçare, u varros të shtunën pas një rekuiemi të madh në Sheshin e Shën Pjetrit dhe një procesioni funeral nëpër rrugët e Qytetit të Përjetshëm. Varri i tij ndodhet në korridorin e majtë të bazilikës, në një vend të thjeshtë dhe solemn.

Arkivoli i papës u vendos privatisht në një ceremoni të vogël pasdite, dhe mbi të u vendos një pllakë e bardhë mermeri me mbishkrimin “Françesku”. Sipër varrit ndodhet edhe një replikë e kryqit të tij pektoral prej argjendi.

Në orën 16:00 të pasdites së sotme, kardinalët do të mblidhen në varr për të mbajtur një lutje mbrëmjeje, para se të nisë konklava për zgjedhjen e pasardhësit të Papa Françeskut, papës së 266-të të Kishës Katolike, transmeton albinfo.ch.