Hapet qendra federale e azilit në Alpnach

Ajo do të qëndrojë e hapur më së voni deri më 18 shkurt 2014, gjegjësisht gjithsej gjashtë muaj

Të martën është hapur në mënyrë zyrtare  në Alpnach (Obwalden) qendra për strehimin e azilkërkuesve në të cilën ka vend për 100 veta. Qendra është nën administrimin  e Qeverisë Federale, gjegjësisht Zyrës federale për Migracion (BFM) dhe është vendosur në një godinë të ushtrisë. Ajo do të qëndrojë e hapur më së voni deri më 18 shkurt 2014, gjegjësisht gjithsej gjashtë muaj.

Në këtë qendër do të vendosen para së gjithash familjet e porsaardhura refugjate me fëmijë, që kanë kërkuar azil në Zvicër dhe janë në pritje të një përgjigje. Ata do të qëndrojnë në Alpnach mesatarisht në mes tri dhe gjashtë javësh.

Ndërmarrja e specializuar për përkujdesje të qendrave të azilit ORS do të marrë mbikëqyrjen edhe të kësaj qendre. Ajo, në bashkëpunim me komunën, është në kërkim të mundësive për angazhim të përkohshëm në punë të banorëve të rinj azilkërkues. Ripërtëritja e shtigjeve malore për ecje është një ndër angazhimet që merren në konsideratë, shkruan BFM, njofton nzz,ch.

Një marrëveshje e bërë në mes të qeverisë në Bernë dhe komunës Alpmach përcakton që azilkërkuesit mund t`i shfrytëzojnë objektet dhe hapësirat sportive e shkollore, “për shkaqe organizative” gjatë ditëve të punës në mes të orës 7 dhe 18 vetëm pas marrëveshjes me autoritetet e komunës. Sipas BFM-se, shfrytëzimi i tyre nuk është i lejuar në mënyrë të pakufizuar as për të tjerët.