Hasani: Samiti i NATO-s në Tiranë në 2027, mbështesim dialogun Kosovë – Serbi

Shqipëria ka një objektiv ambicioz për t’u bërë anëtare e Bashkimit Evropian brenda kësaj dekade.

“Objektivi ynë është i qartë: në vitin 2025 synojmë të hapim të gjithë grup-kapitujt dhe të mbyllim grup-kapitullin e gjashtë, ndërsa deri në fund të vitit 2027, planifikojmë të mbyllim të gjitha negociatat dhe të jemi gati për anëtarësim në Bashkimin Evropian deri në vitin 2030. Ky është një qëllim ambicioz, dhe diplomacia do të luajë një rol kyç në realizimin e tij, me komunikim dhe bashkëpunim të ngushtë me shtetet anëtare të BE-së”, tha Igli Hasani, ministër për Evropën dhe Punët e Jashtme.

Në vijim të angazhimit të saj në Aleancën Atlantike të Veriut, Shqipëria po përgatitet që pas dy vjetësh të bëhet e para në rajon që mirëpret Samitin e NATO-s në kryeqytet.

“Ka nisur bashkëpunimi konkret me NATO-n për organizimin e Samitit të Aleancës në Tiranë në vitin 2027, ku Shqipëria do të jetë vendi i parë që do të presë një ngjarje kaq të rëndësishme në rajon”, shtoi Hasani.

Gjatë një takimi me gazetarët, ministri Hasani nënvizoi edhe nevojën për dialog mes Kosovës dhe Serbisë, duke dënuar aktet e dhunës dhe të terrorizmit, që janë regjistruar së fundmi.

“Kemi mbështetur gjithmonë dialogun e lehtësuar ndërmjet Kosovës dhe Serbisë, i cili ka për qëllim normalizimin e marrëdhënieve dhe arritjen e një marrëveshjeje të qëndrueshme paqësore. Ky proces është i domosdoshëm për stabilitetin afatgjatë të rajonit dhe për integrimin e të dyja shteteve në strukturat evropiane. Shqipëria ka luajtur një rol konstruktiv në këtë dialog, duke inkurajuar palët për të shprehur fleksibilitet dhe angazhim të vërtetë për arritjen e një marrëveshjeje që do të respektojë të drejtat e të gjithë qytetarëve dhe do të sigurojë një paqe të qëndrueshme. Kemi ofruar, gjithashtu, mbështetje të vazhdueshme për Kosovën në këtë proces, duke lobuar për mundësitë që ky dialog të përfshijë përfitime të prekshme për të dyja vendet dhe për integrimin e Kosovës në bashkësinë ndërkombëtare”, deklaroi ministri.

Angazhimi i Shqipërisë, shtoi Hasani, është të mbrojë të drejtat e shqiptarëve në rajon dhe të promovojë stabilitet e paqe. /