Hoti: Koalicioni qeverisës ka humbur legjitimitetin

Kryetari i Grupit Parlamentar të LDK-së, Avdullah Hoti, tha se koalicioni qeverisës e ka humbur legjitimitetin për të qeverisur vendin, prandaj çdo vendim i marrë nga Qeveria mund të konsiderohet i kontestueshëm.

Këto deklarime ai i ka bërë në tryezën e LDK-së: “Sfidat e Kuvendit të Kosovës, në realizimin e mandatit kushtetues”, përcjell albinfo.ch.

Shefi i deputetëve të LDK-së tha se ka dështuar kontrolli demokratik i Kuvendit ndaj Qeverisë. Hoti përmendi shumë çështje që, sipas tij, e kanë lëkundur stabilitetin institucional të Kosovës nga vetë koalicioni qeverisës. Gazetari Adriatik Kelmendi kërkoi që të arrihet konsensus ndërmjet partive politike shqiptare në mënyrë që të mos bllokohet jeta institucionale.

Ai theksoi se nuk sheh interesim nga asnjëra parti për zgjedhje të parakohshme, derisa Kosovën e presin dy proceset më të vështira  në 20 vjetët e fundit, përmbyllja e dialogut me Serbinë dhe Gjykata Speciale. Lulzim Peci nga KIPRED-i tha se nëse vendi do të shkojë ose jo në zgjedhje,  është në dorën e Listës serbe.