Hyn me armë në qendrën e votimit, por arrestohet nga policia

Një incident i rëndë është regjistruar paraditen e sotme në një qendër votimi në Durrës. Sipas policisë shqiptare një 53-vjeçar është futur me armë në qendrën e votimit, kërcënon komisionerët, thyen kutinë e votimit, por arrestohet në flagrancë.

Ngjarja ka ndodhur rreth orës 08:55, në Katund Sukth, Durrës, ku shtetasi Ramiz B. 53 vjeç, banues në Katund Sukth, është futur me armë zjarri në QV nr. 1521, dhe pasi ka kërcënuar komisionerët, ka marrë kutinë e votimit duke e nxjerrë jashtë ambienteve të QV dhe ka hedhur materialet zgjedhore, transmeton TCH.

Reagimi në kohë i Policisë shqiptare bëri të mundur kapjen e këtij personi, përcjell albinfo.ch.

Gjatë kontrollit të ushtruar, Policia i gjeti dhe sekuestroi armën e zjarrit automatik model 56, me të cilën autori hyri në qendër votimi .

Materialet hetimore i kaluan Prokurorisë pranë Gjykatës së Shkallës së parë Durrës për veprat penale “Mbajtja pa leje e armëve luftarake dhe municionit “, “Pengimi i subjekteve zgjedhore” dhe “Dëmtimi me dashje i materialit zgjedhor”.

Policia e Shtetit thotë se është e vendosur për të garantuar mbarëvajtjen e procesit zgjedhor si dhe për të mbrojtur liritë dhe të drejtat themelore të qytetarëve. Cilido që do të kryejë veprime që cenojnë procesin e votimit dhe liritë e të drejtat e qytetarëve, do të përgjigjet para ligjit.