Hyra Morina Sylkaj, shqiptarja e parë shofere e autobusit në Vjenë

Në Kosovë ajo la pas jo vetëm familjen dhe profesionin e saj si ekonomiste. Një ndryshim profesioni ndodhi kur ajo u zhvendos në kryeqytetin austriak...

Hyra Morina Sylkaj, për revistën albinfo.at ka treguar se kur erdhi në Vjenë gjëja e parë që bëri ishte përkthimi i lejes së vozitjes. Me të bërë këtë, Hyra nisi aplikimet për punë, dhe leja e vozitjes ia hapi rrugët. Ajo nisi punën si shofere në kompaninë „Blaguss“, ku punon tashmë qe disa muaj. Kështu, ajo sot është shqiptarja e parë që drejton autobusin në Vjenë.

Rrugëtimi për në Vjenë

Hyra erdhi në Vjenë para një viti për t´iu bashkuar bashkëshortit të saj që po jetonte dhe punonte këtu. Ajo nisi menjëherë kursin e gjuhës gjermane dhe përktheu dokumentet e saj, përfshirë diplomën universitare dhe lejen e vozitjes që i kishte nga Kosova. Ishte bashkëshorti ai që e shtyu të aplikonte për punë si shofere, profesion për të cilën Hyra thotë se e ushtron me kënaqësi.

„Unë jam ekonomiste e diplomuar dhe në Kosovë punova për shumë vite në një kompani. Edhe aty kur e lashë punën për të ardhur në Vjenë, mora përkrahje të madhe nga kolegët dhe për këtë u jam shumë falënderuese. Kur erdha në Vjenë, fillova menjëherë kursin e gjuhës gjermane, ndërkohë bashkë me burrin po merreshim me përkthimin e dokumenteve. Pastaj ai më shtyu të aplikoj për punë si shofere, dhe sot jam duke e ushtruar këtë profesion“, ka thënë Hyra.

Hyra: Më vonë e kuptova që jam shqiptarja e parë që vozit autobusin

Kur aplikoi për punë si shofere, Hyra nuk e dinte se po bëhej shqiptarja e parë që voziste autobusin. Ajo kishte diskutuar me familjen dhe burrin, të cilët i kishin dhënë përkrahje të madhe në këtë drejtim, duke e shtyrë ta sfidojë dhe tregojë veten në këtë profesion.

„Të gjithë më thoshin të shkoja si shofere autobusi dhe ta tregoja veten, e t´i motivoja edhe gratë e tjera shqiptare për këtë profesion. T´u tregoja se ne mund t`ia dalim në secilin profesion që synojmë të punojmë”, ka thënë ajo.

„Unë kisha dëgjuar se ka shumë shqiptare në perëndim që ngasin autobusin dhe nuk e kisha menduar që në Vjenë nuk kishte shqiptare në këtë profesion. Vetëm kur e nisa punën e kuptova se isha e para, dhe sigurisht se ndjehesha krenare“, ka thënë tutje ajo.

Hyra ka shtuar se ky fakt e motivon për të vazhduar punën e saj, të cilën e kryen me përgjegjësi maksimale. Ajo ka thënë se shpesh kur pasagjerët e shohin që po i vozitë një grua, atyre iu shfaqet një buzëqeshje, dhe kjo e gëzon tejmase Hyrën.

 

---