I dyshuar për trafik kokaine, vritet shqiptari në Kolumbi

Policia shqiptare po kërkon informacion nga kolegët kolumbianë nëse kjo ngjarje ka lidhje me narkotrafikun dhe përfshirjen e shqiptareve në trafikun e kokainës

Një shqiptar ka mbetur i vrarë me armë zjarri në kryeqytetin kolumbian Bogota i cili dyshohet se është i përfshirë në ndonjë grup trafikantësh të drogës.

Lajmin e ka bërë të ditur gazetari Artan Hoxha, i cili ka publikuar në profilin e tij në Facebook detaje mbi vrasjen e Adriatik Lagji, përcjell albinfo.ch.

“Pas vrasjeve të vitit të kaluar dhe 4 atentateve ku viktima ishin shqiptarët në Guayaquil të Ekuatorit, këtë radhë ngjarjet janë zhvendosur në Kolumbi, vendi nga ku u nis kontejneri me 613 kg kokainë i kapur në Maminas një muaj e gjysmë më parë”, ka shkruar ai.

Menjëherë kanë nisur hetimet dhe kontaktet me autoritetet shqiptare, pasi dyshimet kryesore janë tek narkotrafiku. Policia shqiptare po kërkon informacion nga kolegët kolumbianë nëse kjo ngjarje ka lidhje me narkotrafikun dhe përfshirjen e shqiptareve në trafikun e kokainës.